பௌத்தர்கள் வாழாத பகுதிகளில் பௌத்த விகாரைகள் அமைக்கப்படுவதை தமிழ்தேசிய கூட்டமைப்பு எதிர்க்கும்

0
49

(பாறுக் ஷிஹான்)

பௌத்தர்கள் வாழாத பகுதிகளில் பௌத்த விகாரைகள் அமைக்கப்படுவதை தமிழ்தேசிய கூட்டமைப்பு எதிர்க்கும் என கூறியிருக்கும் அக்கட்சியின் நாடாளுமன்ற உறுப்பினரும், ஊடக பேச்சாளருமான எம்.ஏ. சுமந்திரன் மகாவலி அதிகாரசபை வடக்கிற்கு தண்ணீர் கொண்டுவருவதாக கூறிக்கொண்டு சிங்கள மக்களை கொண்டுவந்து குடியேற்றி வருவதையும் தமிழ்தேசிய கூட்டமைப்பு எதிர்க்கும் எனவும் கூறினார்.

சமகால அரசியல் நிலமைகள் குறித்து நாடாளுமன்ற உறுப்பினர் எம்.ஏ.சுமந்திரனின் யாழ். அலுவலகத்தில் நேற்று (26) மாலை ஊடகவியலாளர் சந்திப்பு ஒன்று நடைபெற்றிருந்தது.

தன்போது பௌத்தர்கள் வாழாத பகுதிகளில் பௌத்த விகாரைகள் அமைக்கப்படுது தொடர்பாகவும், மகாவலி அதிகாரசபையினால் திட்டமிட்டு சிங்கள மக்கள் குடியேற்றப்படுவது தொடர்பாகவும் ஊடகவியலாளர்கள் எழுப்பிய கேள்விக்குப் பதிலளிக்கும்போதே நாடாளுமன்ற உறுப்பினர் எம்.ஏ.சுமந்திரன் மேற்கண்டவாறு கூறியுள்ளார்.

இதன் போது மேலும் அவர் கூறுகையில்,

வடகிழக்கு மாகாணங்களின் நிலமைகள் தொடர்பாக 2011ம் ஆண்டு 2 அறிக்கைகளை நாங்கள் சமர்பித்துள்ளோம். அதில் இந்த பௌத்த விகாரை அமைப்பு விடயமும் உள்ளடக்கப்பட்டிருக்கின்றது. அதன் பயனாக பல விகாரைகள் அகற்றப்பட்டுள்ளன. ஆனாலும் புதிதாக அமைக்கப்படுவது நிறுத்தப்படவில்லை.

இந்நிலையில் பௌத்தர்கள் வாழாத பகுதியில் பௌத்த விகாரைகளை அமைப்பதை நிறுத்தவில்லை. எனவே, அது தொடர்பாக நடவடிக்கை எடுப்போம். மேலும், மகாவலி அதிகாரசபை வடக்கு மக்களுக்கு தண்ணீர் தரட்டும். சிங்கள மக்களை தரவேண்டாம் என நான் நாடாளுமன்றில் கூறியிருக்கின்றேன்.

அண்மையில் வடமாகாணசபை உறுப்பினர்கள் முல்லைத்தீவு மாவட்டத்தின் எல்லை கிராமங்களுக்கு சென்றிருக்கின்றனர். மேலும் இன்று (நேற்று) மாகாணசபை உறுப்பினர்களும், நாடாளுமன்ற உறுப்பினர்களும் சந்தித்து பேசுவதாக தீர்மானிக்கப்பட்டிருந்தது.

அது பின்னர் தவிர்க்க முடியாத காரணங்களினால் ஒத்திவைக்கப்பட்டுள்ளது. எனவே இந்த விடயங்களை மிக முக்கியத்துவம் வாய்ந்தவையாக கருதி தமிழ் தேசிய கூட்டமைப்பு நடவடிக்கைகளை எடுக்கும். கிழக்கு மாகாணத்தில் ஏற்பட்ட நிலமைகளைபோல் வடக்கில் ஏற்பட இடமளிக்கப்படாது என்றார்.

_DSC0350

LEAVE A REPLY