பாரிய அரசியல் பொருளாதார நெருக்கடிக்குள் நல்லாட்சி அரசு: கட்சி அரசியலை நோக்கி நகரும் பிரதான கட்சிகள்

0
61

-மஸிஹுத்தீன் இனாமுல்லாஹ்-

2015 ஆம் ஆண்டு மஹிந்த ராஜபக்ஸ அவர்களின் பலம்ம் வாய்ந்த அரசை கவிழ்த்து ஆட்சிக்கு வந்த நல்லாட்சிக் கூட்டணி தேசிய அரசு இன்று பாரிய அரசியல் மற்றும் பொருளாதார நெருக்கடிக்கு முகம் கொடுத்து வருகின்றது.

அரசியலமைப்பின் மீதான 19 ஆவது சீர்திருத்தச் சட்டத்தை பல்வேறு சவால்களுக்கு மத்தியிலும் கொண்டுவந்து நாட்டின் அடிப்படை ஜனநாயக கட்டமைப்புக்களை வலுப்படுத்தியதோடு சுயாதீன ஆணைக்குழுக்களையும் ஏற்படுத்தியதன் மூலம் இந்த நாட்டில் நல்லாட்சி நிலவுவதற்கான அடித்தளத்தை தேசிய அரசு ஏற்படுத்தி சாதனை படைத்தமை வரலாறாகும்.

அதேபோன்று இடைக்கால அரசின் நூறு நாள் வேலைத் திட்டத்தின் மூலம் நாட்டு மக்கள் எதிர்கொண்டிருந்த பல உடனடி பிரச்சினைகளிற்கும் இடைக்கால அரசு பல தீர்வுகளை முன்வைத்திருந்தது.

தற்பொழுது அமுலில் உள்ள அரசியல் யாப்பில் உள்ள இன்னோரன்ன குறைபாடுகளை நிவிர்த்தி செய்து புதிய அரசியலமைப்பு ஒன்றை வரைவு செய்வதற்காக இலங்கைப் பாராளுமன்றம் (05/04/2016) முதல் அரசியலமைப்பு சபையாக மாற்றப்பட்டுள்ளது.

அதேவேளை சர்வதேச சமூகத்தினால் தனிமைப்படுத்தப் பட்டிருந்த இலங்கை இன்று தனது உறவுகளை புதுப்பித்துக் கொள்வதற்கும் சர்வதேச சமூகத்தின் நெருக்குவாரங்களில் இருந்து விடுபடுவதற்கும் நல்லாட்சி அரசு தனது இராஜ தந்திர நடவடிக்கைகளை துரிதப்படுத்தியமை குறிப்பிடத்தக்க முன்னேற்றமாகும்.

என்றாலும் தற்போதைய நிலையில் நல்லாட்சி தேசிய அரசு இரண்டு பல்வேறு பிரதான சவால்களை சந்தித்து வருகின்றது அவற்றை இரு பிரதான தலைப்புக்களின் கீழ் ஆராயலாம்:

1. பொருளாதார நெருக்கடி

2. அரசியல் நெருக்கடி

பாரிய பொருளாதார நெருக்கடியில் இலங்கை.
2016 இறுதியில் இலங்கை அரசு 103 பில்லியன் அமெரிக்க டாலர்கள் கடன் என மதிப்பிடப் பட்டுள்ளது, சுமார் 60% வெளிநாட்டுக் கடன்கள், இப்போதைக்கு தலைக்கு 325000 ரூபாய்கள் கடன். இது மொத்த தேசிய உற்பத்தியில் 100% விகிதம் கடன் மதிப்பிடப் பட்டுள்ளது.

இவ்வருடமும் அடுத்த வருடமும் மீள் செலுத்தப் படவேண்டிய கடன் தொகை சுமார் 8.5 பில்லியன் அமெரிக்க டாலர்கள்.

மைத்ரி அரசு பதவிக்கு வந்தவுடன் 4 பில்லியன் அமெரிக்க டாலர்களை சர்வதேச நாணய நிதியத்திடம் கேட்க அதனைநிராகரித்த நிதியம் தற்பொழுது சுமார் 1.5 பில்லியன்களை வழங்க பல்வேறு பொருளாதார சீர்திருத்த நிபந்தனைகளை விதித்துள்ளது.

வெளிநாட்டுக் கடன்களைக் செலுத்துவதற்கு அரச நிறுவனங்களை தனியார் மயப்படுத்துதல், எதிர்கால அரச அபிவிருத்திகளில் பலதேசியக்க் கம்பனிகளை பங்குதாரர் ஆக்குதல், பொருள்கள் சேவைகள் மீதான VAT வரியை அதிகரித்தல் என பல்வேறு நடவடிக்கைகளை மேற்கொள்ள வேண்டிய நிலையில் அரசு இருக்கின்றது.

கடந்த ஆட்சிக் காலத்தில் பாரிய அளவில் ஊழல் மோசடி நடவடிக்கைகளில் ஈடுபட்ட உயர்மட்ட அரசியல் வாதிகளுக்கு எதிராக சட்ட நடவடிக்கைகள் மேற்கொள்வதாகவும், வெளிநாடுகளில் குவிக்கப்பட்டுள்ள சொத்து செல்வங்களை மீளப் பெற்றுக் கொள்வதாகவும் உறுதியளித்த நல்லாட்சி அரசு அதற்காக பல விசாரணைக் குழுக்களை குறிப்பாக இலஞ்ச ஊழல் ஒழிப்பு ஆணைக்குழு, நிதி மோசடி விசாரணைக்குழு, ஜனாதிபதி விசாரணை கமிஷன், அரச நிறுவனங்கள் தொடர்பான பாராளுமன்ற விசாரணைக் குழு என பல பொறிமுறைகள் செயற்பட்டாலும் இதுவரை குறிப்பிட்டுக் கூறக் கூடிய எவ்வித முன்னேற்றமும் இடம் பெறவில்லை.

அரசியல் நெருக்கடி

தற்போதைய தேசிய அரசில் ஜனாதிபதி மைத்ரி, பிரதமர் ரணில் ஆகியோர் புரிந்துணர்வுடன் செயற்பட்டாலும் அவ்விருவரும் இரு பிரதான தேசிய கட்சிகளான ஐக்கிய தேசியக் கட்சி மற்றும் சுதந்திரக் கட்சி ஆகியவற்றின் தலைவர்கள் ஆவர்.

இன்று தேசிய அரசியலில் குறிப்பாக உள்ளூராட்சித் தேர்தல் நடை பெறவுள்ள நிலையில் மூன்றாவது அணியாக முன்னாள் அதிபர் மஹிந்த ராஜபக்ஷ அவர்களும் அவர்களோடுள்ள கடும் போக்கு உதிரிக் கட்சிகளும் களமிரங்குகின்ற சமிக்ஞைகளை வெளியிட்டு வருவது அரசிற்கு பன்முக சவால்களை தோற்றுவித்துள்ளது.

மேற்படி தரப்பினர் மீண்டும் தமது பலமான அரசியல் பிரவேசத்திற்கு கடும்போக்குவாத இனமதவெறி பரப்புரைகளில் தங்கியிருப்பதனை குறிப்பாக சிறுபான்மை இனங்களுக்கெதிரான அரசியல் பரப்புரைகளில் ஈடுபாடு காட்டுவதனை நாம் அறிவோம்.

அதேவேளை சுதந்திரக் கட்சியின் தலைவர் என்ற வகையில் மஹிந்த அணி பிளவு படுவதை ஏதேனும் வகையில் கையாள்வதன் மூலம் மாத்திரமே உள்ளூராட்சி தேர்தல்களில் மாத்திரமன்றி எதிர்கால பாராளுமன்ற மற்றும் ஜனாதிபதி தேர்தல்களில் ஐக்கிய தேசியக் கட்சிக்கு முகம்கொடுக்கும்வகையில் சுதந்திரக் பலப் படுத்திக் கொள்ளும் கடப்பாடு ஜனாதிபதி மைதிரிக்கு இருக்கின்றது.

அதேபோன்றே ஏதோ ஒரு வகையில் சுதந்திரக் கட்சியை பலவீனப் படுத்தவேண்டிய தேவை ஐக்கிய தேசியக் கட்சியிற்கு இருப்பதனை அண்மைக்கால நகர்வுகள் உணர்த்துகின்றன. குறிப்பாக மஹிந்த ராஜபக்ஷ அணியினரை பிரித்தெடுப்பதில் அவர்களுக்கு சாதகமான அரசியல் சூழ்நிலைகள் இருக்கின்றன.

இந்த நிலையில் தான் பல்வேறு பாரிய ஊழல் மோசடி குற்றங்களுக்காக பிடிக்கப்பட்டவர்கள் பிணையில் விடுவிக்கப் பட்ட பின்னரும் பல்வேறு அரசியல் நகர்வுகளில் புரிந்துணர்வுகளில் பெரும்நம்பிக்கைகளுடன் ஈடுபாடுகாட்டி வருகின்றனர்.

முன்னாள் பாதுகாப்புச் செயலாளர் அரசியலுக்கு வருவாரா ? அதிபர் மஹிந்த பிரதமர் வேட்பாளராக வருவாரா..? அவர்கள் அரசியலுக்குள் கொண்டு வரப்பட்டால் சந்திரிக்கா அம்மையார் தேசிய அரசிற்கான ஆதரவை விலக்கிக் கொள்வாரா ? என்றெல்லாம் செய்திகள் அடிபடுகின்றன.

இவ்வாறான அரசியல்கள நிலவரங்களில் மூன்றாம் அணியினருக்கும் கடும்போக்கு உதிரிக் கட்சிகளுக்கும் ஏற்பட்டுள்ள சாதகமான சந்தை வாய்ப்புக்கள் அவர்களுக்கு துணை போகும் இன மத வெறிக் கும்பல்களிற்கு மிகச் சாதகமான களநிலவரங்களை தோற்றுவித்துள்ளன.

நல்லாட்சி கூட்டணி அரசு இன்னும் எவ்வளவு காலத்திற்கு நிலித்து நிற்கும் என்பது இன்று கேள்விக்குறியாகியுள்ளது.

முன்னாள் ஜனாதிபதி மஹிந்த ராஜபக்ஷ அவர்களின் அரசியல் நகர்வுகள்
நல்லாட்சி அரசு அமையுமட்டும் ஐக்கிய மக்கள் சுதந்திர முன்னணியின் பலம் வாய்ந்த தலைவராக இருந்த முன்னாள் ஜனாதிபதி அவர்களிடமிருந்து நிறைவேற்று அதிகாரம் கொண்ட புதிய ஜானாதிபதி மைத்ரி சுதந்திரக் கட்சியின் தலைமையை பல்வேறு சவால்களுக்கு மத்தியில் முன்னாள் ஜனாதிபதி சந்திரிக்கா அம்மையாரின் வழிகாட்டலில் கையகப் படுத்திக் கொண்டார்.

அதற்கு நல்லாட்சி அரசு பாரிய விலையைக் கொடுக்க நேரிட்டது 19 ஆவது அரசியலமைப்பு சீர்திருத்த சட்ட மூலத்தை பாராளுமன்ற மூன்றில் இரண்டு பெரும்பான்மையுடன் சட்டமாக்கிக் கொளவதற்கு ஐக்கிய மக்கள் சுதந்திர முன்னணி விசேடமாக மஹிந்த அணியில் இருந்த பிரதான சுதந்திரக் கட்சி உறுப்பினர்களுக்கு அமைச்சு பிரதியமைச்சு பதவிகளை மற்றும் சலுகைகளை வழங்க வேண்டிய கட்டாயம் ஏற்பட்டது.

என்றாலும், 2015 பொதுத் தேர்தல் இடம் பெற்ற பொழுது ஐக்கிய மக்கள் சுதந்திர கூட்டமைப்பினதும் சுதந்திரக் கட்சியினரது அழுத்தத்தின் பெயரில் முன்னாள் அதிபர் மஹிந்த ராஜபக்ஷ அவர்களை குருனாகலையில் போட்டியிட அனுமதிக்க வேண்டிய கற்றைய நிலை ஏற்படுமளவிற்கு மஹிந்த அணியினரது அரசியல் நகர்வுகள் வலுப்பெற்றிருந்தன.

முன்னாள் ஜனாதிபதி மஹிந்த ராஜபக்ஷ மற்றும் அவரது குடும்ப உறுப்பினர்கள், பாதுகாப்புச் செயலாளர் கோதாபாய ராஜபக்ஷ, முன்னால் பொருளாதார அபிவிருத்தி அமைச்சர் பசில் ராஜபக்ஷ ஆகியோருக்கு எதிராக பலமான குற்றச் சாட்டுக்கள் இருந்த பொழுதும் மக்கள் எதிர்பார்த்த வீச்சில் அவர்களுக்கு எதிரான சட்ட நடவடிக்கைகள் இடம் பெறாமைக்குப் பின்னால் அரசியல் நிகழ்ச்சி நிரல் இருந்ததனை உணர முடிந்தது.

இலங்கையில் மூன்றாவது பாரும் அரசியல் அணியாக இன்று முன்னாள் அதிபர் மகிந்த ராஜபக்ஷ அவர்களது தலைமையிலான கூட்டு எதிரணி பரிணாமம் அடைந்துள்ளது, சுதந்திரக் கட்சியை ஒன்றிணைய விடாது கூறுபோடுகின்ற அரசியல் நகர்வுகளை பிரதமர் ரணில் விகிரமசின்ஹா மேற்கொள்வதாகவும் அதற்கேற்றவகையில் மஹிந்த ராஜபக்ஷ தரப்பினரை பாதுகாப்பதாகவும் அவர்களை வளர்த்துவிட்டதாகவும் ஊகங்கள் வெளியிடப்பட்டிருந்தன.

ஐக்கிய தேசியக் கட்சியின் அரசியல் நகர்வுகளைப் புரிந்து கொண்ட ஜனாதிபதி மைத்ரிபால சிறிசேன சுதந்திரக் கட்சியை பலப்படுத்துகின்ற நகர்வுகள் குறித்து கூடுதல் கரிசனை செழுத்துவதனையும் முன்னாள் அதிபர் மஹிந்த ராஜபக்ஷ அணியினரின் அரசியல் செல்வாக்கையும் மக்கள் ஆதரவுத் தளத்தையும் சாதகமாக பரிசீலிக்கின்ற சமிக்ஞைகளை வெளியிட்டு வருவதாகவே தெரிகின்றது.

நல்லாட்சி அரசின் நிகழ்ச்சி நிரல் எப்படிப் போனாலும் இரண்டு பிரதான அரசியல் கட்சிகளும் எதிர்கால தேர்தல்களை கருத்திற்கொண்டு தத்தமது அணிகளை பலப்படுத்திக் கொள்கின்ற கைங்கரியங்களை நேரடியாகவும் மறைமுகமாகவும் மேற்கொள்வதனை அவதானிக்க முடிகின்றது. ஐக்கிய தேசியக் கட்சியின் அரசியல் நகர்வுகள் மற்றும் பொது எதிரணியினரின் அரசியல் நகர்வுகள் ஜனாதிபதி மைத்திரி அவர்களை தனிமைப் படுத்தி விடுவதனை அவர் ஒரு பொழுதும் கண்டும் காணாது இருக்கப் போவதில்லை.

அரசியல் கள நிலவரங்களை தமக்குச் சாதகமாக பயன்படுத்தும் மஹிந்த அணியினர்

மேற்படி அரசியல் கள நிலவரங்களை தமக்குச் சாதகமாக பயன்படுத்தும் மஹிந்த அணியினர் பிரதமர் மற்றும் ஜனாதிபதி ஆகிய இருவரையும் உச்ச கட்ட இராஜ தந்திரத்துடன் கையாண்டு வருவதோடு நல்லாட்சி அரசு குறித்த நம்பிக்கஈனங்களை மக்கள் மத்தியில் ஏற்படுத்துவதில் வெற்றிகண்டு வருகின்றனர்.

பொருளாதார நெருக்கடிக்குள்ளாகி இருக்கும் நல்லாட்சி அரசு பாரிய அபிவிருத்தி திட்டங்கள எதனையும் முன்னெடுக்காது இருப்பதனை தமக்குச் சாதகமாக பிரச்சாரம் செய்யும் மஹிந்த தரப்பினர் தாம் பெருந்தெருக்களை துறைமுகங்களை அமைத்ததாகவும், திவிநேகும, மகநெகும திட்டங்களை நாடளாவிய ரீதியில் மேற்கொண்டதாகவும் நல்லாட்சி அரசு எதனையும் செய்யவில்லை என்றும் பொது சன அபிப்பிராயத்தை தோற்றுவித்து வருகின்றனர்.

பொருளாதார நெருக்கடிக்கு முகம் கொடுக்க முனையும் அரசு சர்வதேச நாணய நிதியத்தின் அறிவுறுத்தல்களிற்கு ஏற்ப பொருட்கள் சேவைகள் மீதான வரியினை அதிகரிப்புச் செய்வதனையும், அரச நிறுவனங்களை தனியார் மயமாக்க அரசு எடுக்கும் கொள்கை தீர்மானங்களையும் தமக்கு சாதகமான பிரச்சார கருப்பொருளாக மஹிந்த தரப்பு பயன்படுத்துகின்றது.

அதேபோல், சர்வதேச சமூகத்துடனான உறவுகளை சீர்செய்யும் அரசின் நடவடிக்கைகளை சர்வதேச சமூகத்திடம் இலங்கை சரணடைந்துள்ளதாகவும், ஐ நா மனித உரிமை ஆணைக்குழுவின் அழுத்தங்களிற்கு பணித்து தேசத்தையும் இராணுவத்தினரையும் காட்டிக் கொடுக்கப் போவதாகவும் தீவிரமான பிரச்சாரங்களில் ஈடுபட்டு வருகின்றனர்.

அரசியல் அதிகாரப் பகிர்வின் மூலம் இனப்பிரச்சினைக்கு தீர்வு காண முனையும் அரசின் முன்னெடுப்புக்களை சர்வதேச அழுத்தங்களிற்குப் பணிந்து நாட்டை பிளவுபடுத்தப் போவதாக தென்னிலங்கை மக்கள் மத்தியில் பிரச்சாரம் செய்து வருகின்றனர்.

அண்மைக்காலமாக சிறுபான்மை சமூகங்களின் மனங்களை வெல்லுகின்ற நடவடிக்கைகளையும் மஹிந்த தரப்பு மேற்கொள்வதாக தெரிகின்றது , குறிப்பாக முஸ்லிம் மக்களுடனான சந்திப்புக்களை அவர்கள் மேற்கொண்டு வருகின்றார்கள், கடந்த கால கசப்பான நிகழ்வுகளிற்கு மனம் வருந்துவதாகவும் எதிர்காலத்தில் ஆவை இடம் பெறாதிருக்க உத்தரவாதங்கள் வழங்குவதாகவும் தெரிவிக்கப் பட்டு வருவதோடு அவ்வாறான சம்பவங்களிற்கு பின்னால் இருந்தவர்கள் நல்லாட்சி அரசில் தற்பொழுது முக்கிய பதவிகளில் இருப்பதாகவும் தெரிவித்து வருகின்றனர்.

அண்மையில் வடக்கு முதலவர் சி.விக்னேஷ்வரன் தலைமையில் இடம் பெற்ற எழுக தமிழ் போராட்டம் குறித்து கருத்து வெளியிட்டிருந்த முன்னாள் ஜனாதிபதி மஹிந்த ராஜபக்ஷ அந்த சி.விக்னேஸ்வரனை இனவாதியாக பார்க்க வேண்டாம் எனவும் அவர் தனது அரசியலை திறம்படச் செய்கின்றார் என்றும் கருத்துத் தெரிவித்திருந்தார், சி.விக்னேஸ்வரன் அவர்களது நடவடிக்கைகள் தென்னிலங்கை பேரினவாத சக்திகளுக்கு சாதகமாகவே அமையும் என்ற கருத்தினை ஏனைய தமிழ்த் தலைமைகள் விமர்சித்திருந்தமை குறிப்பிடத்தக்கதாகும்.

முஸ்லிம் அரசியல் குழுக்களின் நிலைப்பாடுகள்
எதிர்காலத் தேர்தல்களில் முஸ்லிம் அரசியல் குழுக்கள் எவ்வாறான நிலைப்பாடுகளை எடுக்கப் போகின்றார்கள் என்பது கேள்விக்குறியாகவே வழமைபோல் இருக்கின்றது, உள்ளூராட்சி மன்றத் தேர்தல்களில் மாத்திரமன்றி மாகாண சபை பாராளுமன்றத் தேர்தல்களிலும் புதிய கலப்புத் தேர்தல் முறை அறிமுகப் படுத்தப் படும் பட்சத்தில் சிறிய கட்சிகளிற்கும் சிறுபான்மை கட்சிகளிற்கும் பாதிப்புக்கள் ஏற்படலாம், அவை பிரதான தேசியக் கட்சிகளுடன் உடன்பாடுகளை எய்த வேண்டிய கட்டாய நிலையம் ஏற்படும் சாத்தியப் பாடுகள் இருக்கின்றன.

இவ்வாறான ஒரு நிலையில் ஐக்கிய தேசியக் கட்சின் தலைமையில் ஒரு பிரதான கூட்டணி அமைகின்ற அதேவேளை சுதந்திரக் கட்சி தலைமையிலும் ஒரு கூட்டணி அமையும் என எதிர்பார்க்கலாம். அவ்வாறு அமைந்தால் சுதந்திரக் கட்சி அணியில் மஹிந்த தலைமையிலான எதிர்க் கட்சிக் கூட்டணி பலமான சகதியாக திகழும் சாத்தியப் பாடுகளே அதிகரித்துக் காணப் படுகின்றன.

ஸ்ரீலங்கா முஸ்லிம் காங்கிரஸைப் பொறுத்தவரை வழமைபோல் (சேதாரமில்லா விட்டுக் கொடுப்பு) ஐக்கிய தேசியக் கட்சியுடன் இணைந்தே தேர்தல் களங்களில் குதிக்கும் என நம்பலாம், அதற்கான ஒரு புரிந்துனர்வுடனேயே தலைவர் அஷ்ரஃப் அவர்களது மரணத்தின் பின்னர் இன்றுவரை முஸ்லிம்காங்கிராஸ் தலைமை தீர்மானங்களை எடுத்து தேர்தல் புரிந்துணர்வு உடன்பாடுகளை செய்து வந்திருக்கின்றமை வரலாறாகும்.

அமையவிருக்கும் சுதந்திரக் கட்சிக் கூட்டணியில் கிழக்கிலங்கையை பொறுத்தவரை அமைச்சர் ஹிஸ்புல்லாஹ், அமைச்சர் அதாவுல்லாஹ் போன்றவர்களும் அமையவிருக்கும் புதிய முஸ்லிம் முன்னணியும் இணைந்து தேர்தல் களத்தில் குதிக்கும் சாத்தியப் பாடுகள் தென்படுகின்றன. அமைச்சர் ரிஷாத் தலைமையிலான மக்கள் காங்கிரஸ் ஐக்கிய தேசியக் கட்சியில் இணைந்து கேட்பதற்கு முஸ்லிம் காங்கிரஸ் தரப்பிலிருந்து பலத்த ஆட்சேபங்கள் வரின் அவரும் கிழக்கிலங்கை ஏனைய தலைமைகளோடு சுதந்திரக் கட்சி கூட்டணயில் இணைந்து செயற்பட வேண்டிய நிலை வரலாம்.

முஸ்லிம் அரசியலைப் பொறுத்தவரை சுதந்திர கிழக்கு, கிழக்கின் எழுச்சி அணிகள் மாத்திரமன்றி வடக்கும் கிழக்கும் தனித்தனி மாகாணங்களாக தொடர்ந்தும் இருக்க வேண்டும் எனக் கருதும் அணிகள் மைத்ரி மஹிந்த தலைமையிலான சுதந்திரக் கட்சி கூட்டணியில் இணைந்து கொள்ளும் என கருத முடியும்.

வடகிழக்கு இணைப்பு பிரிப்பு விவகாரம், புதிய அரசியலமைப்பு சீர்திருத்தங்கள், தேர்தல் முறை மாற்றங்கள், எல்லை மீள் நிர்ணயங்கள், முஸ்லிம் தனியார் சட்டங்கள், சமாதான சகவாழ்வு, உற்பட இனமத வெறி சக்திகளின் நகர்வுகள் என பல்வேறு காரணிகள் முஸ்லிம் அரசியலில் மிகவும் கவனமாக பரிசீலிக்கப் படவேண்டிய அம்சங்களாகும்.

தேசிய அரசியல் களநிலவரங்களை மிகவும் பொறுப்புணர்வுடனும் நிதானமாகவும் அணுகி நல்லாட்சி எண்ணக்கருக்களை மையப்படுத்தி எமது எதிர்கால அரசியல் நகர்வுகளை நாம் மேற்கொள்ள வேண்டும், அதற்கான உள்ளக கருத்தாடல்களை இப்பொழுதிருந்தே நாம் ஆரம்பிக்க வேண்டும் என்பதற்காகவே மேற்படி அனுமானங்கள் குறிப்பிடப்பட்டுள்ளன.

LEAVE A REPLY