புற்றுநோயால் அமெரிக்கப் பெண் மரணம் எதிரொலி: இந்தியாவில் Jhonson Powderஆய்வுக்கு அனுப்பப்பட்டது

0
51

அமெரிக்காவில் ஜான்சன் அன்ட் ஜான்சன் பவுடரை பயன்படுத்திய ஒருபெண் புற்றுநோயால் மரணம் அடைந்ததன் எதிரொலியாக மராட்டிய மாநிலத்தில் விற்பனையாகிவரும் இந்நிறுவனத்தின் பவுடரை அரசு அதிகாரிகள் தரப்பரிசோதனைக்காக ஆய்வுக்கூடத்துக்கு அனுப்பி வைத்துள்ளனர்.

அமெரிக்காவில் உள்ள மிசவுரி மாகாணத்தைச் சேர்ந்தவர் ஜாக்குலின் பாக்ஸ் (வயது 62). இவர் கடந்த 35 ஆண்டுகளாக ஜான்சன் அன்ட் ஜான்சன் நிறுவனம் தயாரிக்கும் குழந்தைகளுக்கான பவுடரையும், ஷவர் டு ஷவர் பவுடரையும் பயன்படுத்தி வந்துள்ளார். இதனால் அவருக்கு கர்ப்பப்பை புற்றுநோய் ஏற்பட்டதாக கூறப்படுகிறது. இந்நிலையில் கடந்த அக்டோபர் மாதம் ஜாக்குலின் பாக்ஸ் இறந்தார்.

ஜான்சன் – ஜான்சன் நிறுவனத்தின் பொருள்களைப் பயன்படுத்தியதாலே அவருக்கு கர்ப்பப்பை புற்றுநோய் ஏற்பட்டதாக கூறிய அவரது குடும்பத்தினர் கோர்ட்டில் வழக்குத் தொடர்ந்தனர். இந்த வழக்கை விசாரித்த நீதிபதிகள், ஜான்சன்-ஜான்சன் நிறுவனம் அதனுடைய உற்பத்தி பொருளான முகப்பவுடரில் புற்று நோயை ஏற்படுத்தக்கூடிய ரசாயனப் பொருட்கள் இருப்பதை நுகர்வோருக்கு தெரிவிக்க தவறிவிட்டது என தெரிவித்தனர்.

மேலும், பாதிக்கப்பட்ட ஜாக்குலின் குடும்பத்தாருக்கு, 72 மில்லியன் அமெரிக்க டாலர் நஷ்ட ஈடு வழங்க உத்தரவிட்டனர். இதன் இந்திய மதிப்பு ரூ. 493.50 கோடி ஆகும். இது சம்பந்தமான சுமார் ஆயிரம் வழக்குகள் மிசவுரி மாநில நீதிமன்றத்திலும், சுமார் 200 வழக்குகள் நியூஜெர்ஸி கோர்ட்டிலும் நிலுவையில் உள்ளன.

ஜான்சன் அன்ட் ஜான்சன் நிறுவனம் தயாரிக்கும் பவுடர்களில் ‘டால்கம்’ பயன்படுத்தப்படுகிறது. இந்த டால்கம் பொருளால் புற்றுநோய் ஏற்படுகிறது என தெரியவந்ததையடுத்து, அமெரிக்காவில் பெரும்பாலான அழகுசாதனப் பொருள்களை தயாரிக்கும் நிறுவனங்கள் டால்கம் பயன்படுத்துவதை நிறுத்திவிட்டன. எனினும், ஜான்சன் – ஜான்சன் நிறுவனம் தொடர்ந்து டால்கமை பயன்படுத்தி வந்துள்ளது. இந்நிலையில், ஜான்சன் – ஜான்சன் பவுடரை பயன்படுத்த இந்திய பெண்கள் மத்தியில் அச்சம் எழுந்துள்ளது.

இந்நிலையில், இந்தியாவிலேயே முதல்முறையாக மராட்டிய மாநிலத்தில் ஜான்சன் அன்ட் ஜான்சன் பவுடர்களின் சாம்பிள்களை அம்மாநில உணவு மற்றும் மருந்து கட்டுப்பாட்டுத்துறை அதிகாரிகள் ஆய்வுக்கு அனுப்பி வைத்துள்ளனர். அமெரிக்காவில் ஜான்சன் அன்ட் ஜான்சன் பவுடரை பயன்படுத்திய பெண் புற்றுநோயால் மரணம் அடைந்ததன் எதிரொலியாக இந்த ஆய்வு நடத்தப்படுவதாக தெரியவந்துள்ளது.

இதேபோல், இந்நிறுவனத்தின் தயாரிப்பான இதரப் பொருட்களும் விரைவில் ஆய்வுக்கு உட்படுத்தப்படும் என அதிகாரிகள் தெரிவித்துள்ளனர்.

LEAVE A REPLY