பிள்ளையானின் விளக்கமறியல் நீடிப்பு

0
76

-ஏ.எச்.ஏ. ஹுஸைன் –

தமிழ் மக்கள் விடுதலைப் புலிகள் கட்சியின் தலைவரும் கிழக்கு மாகாண முன்னாள் முதலமச்சருமான சிவநேசத்துரை சந்திரகாந்தன் உட்பட நான்கு பேருக்கான விளக்கமறியல் நீடிக்கப்பட்டுள்ளது.

குறித்த மூவரையும் எதிர்வரும் மார்ச் 09ஆம் திகதி வரை விளக்கமறியலில் வைக்குமாறு மட்டக்களப்பு நீதவான் நீதிமன்ற நீதிபதி எம். கணேசராசா புதன்கிழமை 24.02.2016 உத்தரவிட்டுள்ளார்.

சிவநேசதுரை சந்திரகாந்தன் (பிள்ளையான்) தமிழ் மக்கள் விடுதலைப் புலிகள் கட்சியின் முன்னாள் தேசிய அமைப்பாளரும் மாகாணசபை முன்னாள் உறுப்பினருமான பிரதீப் மாஸ்டர் என அழைக்கப்படும் எட்வின் சில்வா கிருஸ்ணானந்தராஜா, கஜன் மாமா எனப்படும் கனகநாயகம் மற்றும் இராணுவ புலனாய்வு உத்தியோகஸ்தர் எம்.கலீல் ஆகியோருக்கே விளக்கமறியல் நீடிக்கப்பட்டுள்ளது.

இதேவேளை, சிவநேசத்துரை சந்திரகாந்தனால் பிணைமனு கோரி மட்டக்களப்பு மேல் நீதிமன்றில் தாக்கல்செய்யப்பட்ட மனுவினை புதன்கிழமை விசாரணை செய்த மேல் முறையீட்டு நீதிமன்ற நீதிபதி சந்திராணி விஸ்வலிங்கம் எதிர்வரும் 18ஆம் திகதி வரை வழக்கினை ஒத்திவைத்தார்.

நாடாளுமன்ற உறுப்பினர் ஜோசப் பரராஜசிங்கம் 2005ஆம் ஆண்டு மட்டக்களப்பு புனித மரியாள் இணைப் பேராலயத்தில் நத்தார் நள்ளிரவு ஆராதனையில் கலந்துகொண்டிருந்தபோது சுட்டுக்கொல்லப்பட்டிருந்தார்.

இந்தக் கொலைச் சம்பவம் தொடர்பில் குற்றப் புலனாய்வுப் பிரிவினர் கடந்த 11.10.2015 அன்று சிவநேசதுரை சந்திரகாந்தனை கைதுசெய்திருந்தனர்.

LEAVE A REPLY